Bizi izləyin
      AZ  |  EN  |  Ana səhifə         

 

 
ARDNF təcrübə proqramı

Azərbaycan Respublikası Dövlət Neft Fondu insan kapitalina yüksək önəm verdiyindən yeni mütəxəssisləri mütəmadi olaraq öz strukturuna qatmaqdadır. Xüsusən gənc kadrların potensialını yüksək dəyərləndirən Fond xüsusi istedadlı şəxslərin burada çalışması üçün çox əlverişli iş mühiti yaratmışdır.

Dövlət Neft Fondu bakalavr və magistr pilləsinin sonuncu kurs tələbələri və məzunlar üçün yeni təcrübə proqramı elan edir. ARDNF-nin təşkil etdiyi təcrübə proqramı tələbələrin və məzunlarının karyera inkişafında və gələcək planlarında mühüm rol oynayacaqdır. Yüksək ixtisaslı və peşəkar gənc kadr potensialının formalaşdırılmasına yönlənmiş təcrübə proqramının məqsədi, Azərbaycanda və xarici ölkələrdə təhsil almış gənclərə təcrübə qazanmasında yardım etmək, eləcə də investisiyaların idarə olunması sahəsində hazır kadrlar yetişdirib işə cəlb etməkdir.

Proqramın qısa təsviri

Təcrübə proqramı ARDNF-nin bütün departamentləri üzrə təşkil olunur

Proqramın müddəti və mərhələləri: 

Təcrübə proqramının əsasə davamiyyət müddəti 1-3 aylıq dövrü əhatə edir. Proqram 5 mərhələdən ibarətdir.  Proqram 5 mərhələdən ibarətdir:

I mərhələ - Tanışlıq mərhələsidir. Bu mərhələ təcrübəçilərlə ilkin tanışlıq mərhələsi olub Fondun strukturu və siyasəti, nailiyyətləri və planları, idarəedilməsi, müxtəlif departamentlərin fəaliyyəti, təcrübəçinin təcrübədə olacağı departament haqda ətraflı məlumat və digər əlaqədar mövzular üzrə məlumatlandırma məqsədi daşıyır. I mərhələnin əsas məqsədlərindən biri həmçinin seçilmiş təcrübəçiləri departament rəhbərləri və işçilərinə tanıtmaq, eyni zamanda onlara təcrübə proqramını uğurla tamamlamaları üçün faydalı məsləhətlər verməklə səciyyələnir.

II mərhələ - Təlim/tədris mərhələsidir. Bu mərhələdə təcrübəçilərin ümumi biliklərə yiyələnmələri üçün daxili təlimlər, kiçik seminarlar təşkil edilir. Daxili təlimlər bitdikdən sonra təcrübəçilərə fərdi öyrənmə materialları təqdim edilir və təlim/tədris mərhələsi təcrübəçilərin onlara təyin olunan fərdi mövzular üzrə öz biliklərini artırması ilə davam edir. Fərdi öyrənmə materialları ARDNF-nin daxili təlim modulları əsasında hazırlanır və intensiv öyrənməni təmin edir.

III mərhələ -  Əyani tapşırıqların təyin edilməsi mərhələsidir. Bu mərhələdə təcrübəçilər qəbul olunduqları departamentdə mövcud və aktual layihələrə təyin olunurlar. Real tapşırıqlar üzərində çalışarkən təcrübəçilər təyin olunduqları departamentdə müxtəlif təhlillərin aparılması, department daxili fəaliyyətlərin dəyərləndirilməsi, gündəlik proseslərə qoşularaq fikir mübadilələrində iştirak edirlər. Tapşırıqların yerinə yetirilməsi mərhələsinin sonunda təcrübəçilər çalışdıqları layihə haqqında təqdimat hazırlayırlar.  

IV mərhələ - Tamamlama mərhələsidir: Bu mərhələdə, əgər ehtiyac duyularsa, həmçinin təcrübəçinin şəxsi istəyi əsasında digər departamentlərdə də qısa müddətli təcrübə keçə bilər. Bu zaman departamentlərarası iş fəaliyyəti ilə təcrübəçilər tanış olur.

V mərhələ - Yekun qiymətləndirmə mərhələsidir: Təcrübə müddətinin son 1-2 günü ərzində təcrübəçilər faəliyyət göstərdikləri departamentlərin rəhbərləri tərəfindən çeşidli meyarlar əsasında qiymətləndirilirlər. Həmçinin təcrübəçinin özü təcrübə proqramını müxtəlif meyarlar əsasında dəyərləndirir. Bu mərhələ təcrübəçinin işə qəbul olunub-olunmamasını müəyyən edir. Bütün təcrübəçilər sertifikat ilə təltif olunurlar.

 
Təcrübə müddəti ödənişsizdir.

Təcrübə proqramında iştirak etmək üçün tələb olunan keyfiyyətlər

  • İqtisadiyyat, Biznes, Maliyyə, Riyaziyyat və digər bu profilli sahələr üzrə universitet məzunu olmaq və ya universitet təhsilinin sonuncu ilində olmaq;
  • Azərbaycan və İngilis dillərində səlis oxuma, yazma və danışma bacarığı (digər xarici dillərdən sərbəst istifadə vərdişləri əlavə üstünlük olaraq nəzərə alınır);
  • Kommunikasiya və təşkilatçılıq, intensiv iş mühitində işləyə bilmə, davamlı öyrənmə və öyrədə bilmə bacarığı;
  • MS Office proqramlarından sərbəst istifadə bacarığı.

Təcrübə proqramının üstünlükləri

  • Dünyanın ən böyük və tanınmış suveren fondlarından birində təcrübə proqramı keçmək fürsəti
  • ARDNF-nin onlayn tədris akademiyası vasitəsilə maliyyə bazarları və investisiya idarəetməsi üzrə təhsilin artırılması, vəsaitlərin idarə edilməsi sahəsində yüksək səviyyəli bacarıqların, mürəkkəb tapşırıqların həll olunmasında analitik yanaşma və məsələlərin dərin təhlili qabiliyyətlərinin inkişaf etdirilməsi, və əyani tapşırıqlar üzərində işləməklə investisiya idarəetməsi sahəsində praktik vərdişlərin qazanılması
  • Ən yüksək beynəlxalq səviyyədə təmsil olunan maliyyə və investisiya institutlarının çoxillik təcrübəsinə əsaslanan, qlobal səviyyədə qəbul olunmuş korporativ idarəetmə və korporativ mədəniyyət prinsipləri üzərində təşkil olunan və məsələlərin həllində komanda işi yanaşması metodlarından faydalanan daxili idarəetmə sisteminin bir hissəsi olmaqla müasir korporativ idarəçilik prinsiplərinin əyani mənimsənilməsi
  • Təcrübə proqramını uğurla tamamlamaqla ARDNF –da daimi işə qəbul olunma imkanı    

 

Müraciət və qəbul prosesi

Müraciətlər mütəmadi olaraq il boyu qəbul edilir. Qəbul prosesi 3 mərhələdən ibarətdir. Birinci mərhələdə namizədlər ARDNF-nın saytındakı "elektron müraciət forması"nı doldurur. İkinci mərhələdə seçilmiş namizədlər ARDNF-nın təcrübəyə qəbul olunma imtahanına dəvət olunurlar. Qəbul imtahanında aşağıdakı mövzular əhatə olunur:

  • İngilis dili,
  • Məntiq,
  • Riyaziyyat və Riyazi metodlarla məsələlərin həlli,
  • İqtisadiyyat,
  • Korporativ maliyyənin əsasları,
  • Maliyyə hesabatlarının analizi və investisiya idarəetməsinin əsasları.

Üçüncü mərhələdə, imtahanda tələb olunan göstəricini əldə etmiş namizədlər insan resursları və aidiyyatı departamentin rəhbərliyi tərəfindən aparılan 3 mərhələli müsahibə prosesindən keçirilirlər

 
Əlaqə

Azərbaycan Respublikası Dövlət Neft Fondu, İnsan Resursları departamenti

Heydər Əliyev pr. 165, AZ 1029

(+994 12) 498 77 53 (dax. 8006, 8008)

hr@oilfund.az